یک شعر از آقای رسول مهدی زاده
« محبت گولوشون »
گئجه، روزگارین لاپ آجی سؤزودور
گئجه مهربان سیزلیقلارین
قارا کؤلگه سی دیر کی
یئرین باشینا آغیرلیق ائدیر
چیخیش ائت
دان سؤکولوب، قاش آغارسین
گؤزلریوین چیچکلنمه سی
سحرین موشتولوقودور
گؤز آچ
بیر قیزیل گول کیمی
دویولمامیش عطیر لرله
سنله دانیشیب
سئویب سئومکله
محبت گولوشون
سئویملی یوردوما پای وئرم
(1)
گؤزلریم نفرته دولان زامان
اوره گیمده آلوولی
حسرت چیچک لری گؤیه ریلیر
(2)
گؤروشمک قسمت اولماسادا
بو گئجه، رؤیالاریمدا
غمین سون دوراغیندا
گیزلینجه گؤروشه ریک
(3)
آی گؤزلرینه کؤلگه سالمیشدی
بیلمیردی گئجه نین نهایت
قارانلیقی قارا گؤزلرینده گیزله نیب.
رسول مهدی زاده
+ نوشته شده توسط لیلا ابراهیمی در دوم اردیبهشت 1388 و ساعت
17:40 |
